طريقة شراء وفحص الخروف لعيد الاضحى

آش واقع تيفي من الرباط

بغيتي تاخد حولي للعيد وبغيتي تكون متأكد انك متشمتيش وانك فعلا خديتي كبش دايز فالضحية صيبت ليك ارقام على الصورة كل رقم واشنو معناه، تبع هاد النصائح بالحرف:

1 – ايلا وقفتي قدام الحولي ومولاه هاز ليه راسو لفوق قوليه يطلق ليه راسو لحقاش يقدر يكون فيه لولسيس ومع ديك الهزة لولسيسة كتغبر وخا دوز يديك على لقرجوطة مغتبانش ليك ، ادن متخليهش يهز ليه راسو ونتا كدوز يديك على لقرجوطة لا ، يطلقو ويرجع لحولي لوضعيتو العادية عاد قلب لقرجوطة وبقا هابط حتى لكتاف لقيتي لولسيسة سير فحالك ملقيتي والو دوز للرقم 👇

2 – هادي بلاصت الجلبة ولحولي لي يلاه دارها كتكون باينا فهاد لبلاصة لقيتي لاطراس او حبوبة او نفاخ فديك لبلاصة سير فحالك ، ملقيتي والو دوز للرقم 👇

3 – هنا خص القزيبة تاعو تكون فايتا التنية تاع رجليه مافوقها ماقدها ماصغر منها ، غتشد لقزيبة وتلصقها مع الرجل الورانية فايتة التنية ت الرجل وواصلة للنصف التاني مزيان مواصلاش او گرطيط قزيبتو مقطوعا سير فحالك لقيتها هي هاديك دوز للرقم 👇

4 – لگرون خصهم يكونو كاملين مامهرس مامقسوم مامضروب قلب لگرون بجوج ، كان فرطاس وهو خلوق هكاك عندو غ گرينات صغار يلاه باينين راه دايز فالضحية ماشي عيب هداك ، كان عندو گرن وگرن لا سير فحالك خصهم يكونو كاملين مافيهم عيب ، لقيتيهم مزيانين دوز للرقم 👇

5 – الودنين خصهم يكونو طايحين مكايكونوش واقفين بحال تاع لحمار ، بل طايحين الطول ماشي مقياس المهم متكونش مشروما او مقطعة او مجروحة او فيها لحبوب ، كانت لودن كاملا وطايحا دوز للرقم 👇

6 – الفم ، هنا كاينا حاجة لي غ الكسابة لي كايكونو عارفينها ، وهي لقنوفا لفوقانية مخصهاش تكون فايتا لتحتانية ، يعني من لكبش يسد فمو متكونش لتحتانية غابرة وطايحا عليها لفوقانية فايتاها ، خصو يسد فمو يكونو يجيو وحدة فوق وحدة ، وهدا ضيطاي قليل لي كايرد ليه لبال لانك غ تبقا مشطون غ مع واش تني سنان لحليب رباعي ومغاتديهاش فلقنوفة ، وقلب معاك حتى الانف متكونش فيه لخنونا خارجا ودايرة شلال بحال شلالات اوزود خصو يكون مكايسيلش ليه النيف.. لانه ايلا كان كيسيل ليه النيف ولفيضان تاع لخنونة خارج هداك راه عندو مشكل فالجهاز التنفسي تاعو الرية مضروبة ليه غ عطيه بالتيساع القنوفة لفوقانية لقيتيها هي هاديك الانف مكايسيلش دوز للرقم 👇

7 – لعينين ، اول حاجة غتقرب يديك لعين لخروف ودير بحال ايلا غضربو ايلا رمش راه كايشوف ماشي عمى ودير لعملية فالعينين بجوج ، رمش مزيان مرمش راه عما مدايزش ، ثاني حاجة خص الدوارة تاع لعين لدخلانية تكون بيضة بانت ليك صفرة او كلها حمرة را لكبدة مضروبة أو عندو مشكل صحي اخر وبالتالي عطيه تيساع، كايرمش ولعينين كاملين فيهم لبيض دوز للرقم 👇

8 – المخرج تاعو، إذت بغيتي تقلبو حتى هو لقيتي لحبوب عطيه بتيساع ملقيت والو را مزيان ، ومنها نيت تعرف واش معلف مزيان او لا، بغيتي تزيد تتعمق فالتقلاب غتشد لقزيبة من لداخل غتحسب خمس فقرات ونتا هابط لتحت الساتة ورك عليها ، قستي لعضم وحسيتي بيه عضم راه مامشحمش وماعلفش مزيان لقيتي الفقرة الساتة او حتى السابعة مكتقيسش لعضم وحابساك الشحمة ولقفرة كتهرب ليك من صبعك راه عالف مزيان وصحيح ، دوز للرقم 👇

9 – الرجلين ، ايلا كان لخروف مولاه رابط ليه رجليه لقدامين بجوج قوليه يحلو ، باش يبان ليك واقف على الاطراف باربعة ، لا يكون فرك او رجل عايبة عندو او مضروب فرجليه او او ، المهم الرجلين يكونو هازين لخروف ومافيهم عيب ، دوز للرقم 👇

10 – لقيتي هادشي كامل مزيان ودوزتي هادشي ، طلق لخروف يمشي قدامك شويا ، خصو كي تحيد يديك ويطلقو مولاه يتحرك ميبقاش واقف فبلاصتو ، هدا يدل على انه بصحة جيدة

وبهكدا غتكون خديتي الاضحية مافيها حتى عيب ودايزا ليك فالضحية والله يتقبل وحتى لبياع ايلا شافك كتقلب بحال هكدا غيتبت معاك حيتاش غيقول راك حرايفي وحاضي راسك.

الثمن نتا وجهدك وباش ماشريتي، انما خص تتوفر فيه هاد الشروط باش تكون اضحية كاملة مكمولة مافيها عيب لانك غتقدمها قربان لله سبحانه وتعالى يعني خص مايكونش فيها الديفو ..

واللي ماعندوش فهو معفي، لأنها كتبقى سنة.. ولا يكلف الله نفسا الا وسعها.