الخبير أسد الرّايح يرد على خبير أخنوش البريطاني .. منين جبتي هادشي ؟

آش واقع / بوشعيب الكرَيزي 

 

شكون هد الخبير لي جابو لينا لموريدين ديال اخنوش؟؟؟

البارح في الليل اطلت علينا مجموعة من المواقع و الصفحات لي الكثير منها داعم لأخنوش بشكل مباشر او غير مباشر بخبر مفاده انو شي خبير اسمة مارك جونز قاليك الحملة وراها شي اشباح(اسمله الرحمان الرحيم الله يجعل كلامنا خفيف عليهم). هد الأشباح قاليك جاو منظمين و تصاوبو فشي يومين… و لكن كيف ما هد الخيبراطور فاهم تاصلنا تا حنا بالخير الدولي “الاسد الرايح ” مفخرة البلد ولي عندو ابحاث كبيرة و مقالات علمية كثيرة حول العلوم السايبيرانية و لي بالمناسبة يسير العشرات من الحسابات ديال المشاهير… و كان هذا الحوار معاه.

#سؤال سي أسد واش هد الخبير مارك كتعرفو؟

#الجواب هد مارك لا يعتبر خبير كيف ما قدموه هو مجرد استاذ مساعد في جامعة في الإمارات و كياكل خبيز تما و شوية الكبسة و لحم الجمل .. ما عندوش صفة خبير و كايقري شوية بين البحرين و الإمارات لقى لعاقة مجودة راه كايخبط فيها .. ولكن في العلوم راه غا راغب امين هربان عليه بسنوات ضوئية و فاهم حسن منو .. السيد راهوماشي تا استاذ غا استاذ مساعد و معندوش شي ابحاث ولا وجود لاسم في ويكيبيديا .. الخلاصة السيد شخص غير كفئ باش نعتابروه متخصص.

#سؤال و كيفاش تا طاحو عليه صحاب الحمائم؟

#الجواب ببحث صغير غادي تلقى السيد كاتب في تويتر عندو مجموعة تغريدات على الموضوع من خلال التعاطي ديالو مع الموضوع كايبان انو السيد مخلص على هد العمل ولكن ماشي شي خلاص كبير هههه .. و هد العمل و هد التحاليل دارهم كتر من مرة لفائدة زعماء الخليج كل مرة خرج شي هاشطاغ ضدهم .. كايكتب انو شي رقم تاع حسابات وهمية و يحط مبيانات و تفاصيل. ولكن الواقع شيء آخر و هدشي راه واضح انو تحليل غير علمي.

#سؤال ولكن شكون وراه هد للحملة تاع المغرب؟

#الجواب ممكن شي شيخ خليجي بغا يعاون اخنوش و عرفو عليه أو على شي مساعد ديالو .. ولكن للأسف هد مارك علميا كلامو مغلوطة. و المفروض اخنوش يخرج يهضر مع الشعب فاص ا فاص ماشي يجيب لينا واحد يدوي في بلاصتو.

#سؤال سي أسد اش بان ليك في ما نشر انت كبير سايبيراني ؟

#الجواب الا رجعا لتويتر هد مارك غادي نلقاو انو السيد غا كايقمر و خاصة في الخلاصة الأخير تاع هدشي ممكن يكون حقيقي او غير حقيقي او ممكن بصح الشعب باغي اخنوش يرحل … يعني هد مارك ماجاب تا حاجة جديدة .. تخيل دابا هونا جايبين هدا على انو جحة ليهم تا صدق حجة هم ههههه و اكيد استغلوا انو المغاربة ماغاديش يقراو تحليل مكتوب بالانجليزية و دا و ترجمة غير دقيقة بل و محرفة خاصة انو هد مارك داوي و مبازي على تويتر و هنا تويتر ماشي مقياس و الشريحة لي ختار ماشي هي الأكثرية يعني لاماص .. داكشي باش قلت ليك تحليل مافيهم المنهج العلمي و لي كنعتامدوه في التحليل.

#سؤال سي أسد واش هد الحملة عطات الاكل ديالها؟

#الجواب اكيد و الدليل انو تعبان تعليمات لكل أعضاء الحزب انهم يخرجوا و يدافعو على الزعيم و اتوقع أنه غادي يبدى مسلسل جديد تاع عطوه فرصة و غادي نلقاو شي مكثرين و صحافيين يقوليك نحلسوا الحملة تا نشوفو الإجراءات. و كبف كتشوف راه الهاشطاغات لي كانوا 3 بداو ينقصو و ولاو غير جوج و تحيد اخنوش و الفاهم يفهم.

#سؤال آخر سؤال سي أسد .. واش تتوقع المحروقات غادي تنزل في ثمنها؟

#الجواب شخصيا لا اتوقع هدشي و لسبب بسيط الدولار ارتاحت قيمتو و قربات لعشرة دراهم و نص و هدشي كايعني المزيد من الغلاء و المزيد من الكوارث في الأيام القادمة … و عقلوا على كلامي غلاء الدولار غادي يدخلنا في دوامة كثر من غلاء المحروقات.