مسَايْنَة

دليلة فخري- أش واقع

يْلا جيتي
جيبني معاك
نشوفني كيف بقيتْ
بلا بيَّ
تشوفني كيف بقيتْ
بلا بيك

يلا جيتي
جيبني معاك
نعاودو طْقُوس لمْلاقيا:
نسكّْتو لكلامْ
ونخليو نوَّار اللوز يتفْتَّح على شْفاهْنا
يْلا نطقو ديِكْ لكْلمَة
اللّي مافيهاش لحروفْ

..

وانا كنْتْسنَّاكْ
حزَّرتْ الطريق لْماشْيَة فوق حِيرْتِي
تشرب المَسَافة بيناتْنا

فْجغْمَة

حزّْرت الشّمش
تْغزل لحظة اخرى

بالْخيوط اللّي باقية من النهار
ترتّْق بيها صبري
اللي فتّْقاتو الحيرة
وانا كنتسناك

..

وبدا الليل يطلّْ
ويصبغ خيوط النهار
خيط خيط
بلون رمادي

الشمش

حيت تّاهي نْتْوَة بْحَالي

طلعات على خدّْها حمُورية الحشمَة
وحْنَات راسْها
خْبّْعاتو فصْدر الليل

وانا

باقية كنتسناك
تجي
وتجيبني معاك

…

فلمساينة
كبْر الليل
وتجْبّْد ظلّْ تقيل
فوق رجايا

فلمساينة
كبْرو الخْطواتْ
كبرْت الطريقْ
كبْرت الأَرضْ
بدّْلَت كْسوتها لخْضرا
ولبست دموعي

لْوريدَة

اللي ختاريتها لك كيف كَنْختار حْلامي الفَايْقَة
بقى فيها غير الشوك
مخلّْط بدمِّي

ودمِّي
لمجروح بغْيابْك
مهرّْق على عْتبَة
تخرّْجو من ضيقْ الأَمَل ْ
لتيساع ليَّاسْ
وباقي دمي كيتسناك

تْجي
وتجيبني معاكْ.